सुदूरपश्चिममा बजेट विवाद चर्कियो, सत्तापक्षकै सांसदको विरोधपछि प्रदेशसभा बैठक स्थगित
धनगढी । सुदूरपश्चिम प्रदेश सरकारको बजेटलाई लिएर सत्तारुढ दलभित्रै विवाद चर्किएपछि प्रदेशसभा बैठक स्थगित भएको छ। आजै बजेट पारित गर्ने तयारीसहित बिहान ८ बजेका लागि बोलाइएको बैठक भोलि बिहान ९ बजेसम्मका लागि सारिएको प्रदेशसभा सचिवालयले जनाएको छ।
सरकारले प्रस्तुत गरेको बजेटमा बिचौलियामार्फत कमिसनको खेल भएको आरोप लागेपछि सत्तारुढ दलभित्र असन्तुष्टि बढेको हो। स्रोतका अनुसार सरकारका केही मन्त्रीसमेत बजेटप्रति असन्तुष्ट छन्।
बजेटमाथिको छलफल अघि बढाएर आजै पारित गर्ने तयारी भए पनि सत्तापक्षकै प्रदेशसभा सदस्यहरूले यथास्थितिमा बजेट पारित गर्न नसकिने अडान लिएका थिए। उनीहरूले बजेटको विपक्षमा मतदान गर्ने चेतावनी दिएपछि बैठक स्थगित गर्नुपरेको बताइएको छ।
बजेट निर्माणमा अर्थमन्त्री चक्रबहादुर मल्ल, मुख्यमन्त्री खगराज भट्ट र अर्थसचिव राजेन्द्र हमालले एकलौटी गरेको आरोपसमेत लागेको छ। बजेटमा कमिसनको खेल भएको तथा पर्याप्त छलफल नगरी निर्णय गरिएको भन्दै सत्तापक्षभित्रै असन्तुष्टि चुलिएको हो। यद्यपि, बजेटमा कमिसनको खेल भएको भन्ने आरोपको स्वतन्त्र पुष्टि भएको छैन।
नेपाली कम्युनिस्ट पार्टीका प्रदेशसभा सदस्य मानबहादुर धामीले यथास्थितिमा बजेट पारित गर्न नसकिने बताएका छन्। उनले कर्मचारीलाई तलब खुवाउन आवश्यक व्यवस्था गर्न अध्यादेश ल्याउन मुख्यमन्त्रीलाई सुझाव दिएको जानकारी दिए।
धामीले गत असार १ गते प्रस्तुत गरिएको बजेट र अहिलेको बजेटमा कुनै फरक नरहेको दाबीसमेत गरेका छन्। बजेटमा आवश्यक परिमार्जन नगरी पारित गर्न नसकिने उनको भनाइ छ।
सत्तापक्षकै सांसदहरू बजेटको विपक्षमा उभिएपछि प्रदेश सरकारलाई बजेट पारित गराउन थप चुनौती देखिएको छ। बैठक स्थगित भएसँगै बजेटमाथिको छलफल र पारित गर्ने प्रक्रिया अघि बढ्न सकेन।
यता, प्रमुख प्रतिपक्षी दलले भने सरकारको बजेटमा खर्च कटौतीको प्रस्ताव पेस गर्ने तयारी गरेको छ। सत्तारुढ दलभित्रै विवाद बढ्दै जाँदा बजेट पारित हुने प्रक्रिया थप अन्योलमा परेको छ।
तपाईको प्रतिक्रिया